عيب يا ناصر القصبي وعيب يا راشد الشمراني وعيب يا حياة الفهد

مشاركة
* مروان كتانة 02:22 ص، 03 مايو 2020

عام ٢٠١٢ زارنا وفد كويتي رفيع المستوى صحافيين ورؤساء تحرير والمطرب عبدالله الرويشد بصفته سفير للنوايا الحسنة ، ورفض الاسرائيليون ادخال حياة الفهد وسعاد العبدالله وانتظروا تصريح الدخول طويلاً ولكن دون جدوى .

زارو عدة محافظات وقبل ما يسافرو طلبو مني بدهم محل عطارة اخذتهم لوسط البلد شارع الحسبة عشان يشوفو الناس .

طبعاً كانو لابسين كاجوال مش الزي الكويتي ، واحنا داخلين عالمحل  كان عالباب حجّات ببيعو خضرة ، صحفي من تلفزيون الراي الكويتي وقف عند وحدة من الحجات واشترى شوية فقوس واعطاها ١٠٠ دولار وراح ، قالتله الحجة استنى يا خالتي ارجعلك الباقي . رد عليها : ما يخالف ، يعني مش مشكله اشارة انه ما بده الباقي .

قالتله استنى تمشيش ، انت من وين ؟  حكالها انا من الكويت .

وقفت ورمت عليه ال ١٠٠ دولار وقالتله انت ما بتستحي على حالك ؟  ضيف عنا وبتدفع وحملت كل صندوق الفقوس وأعطته اياه .

انصدم الرجل لأنه ما بشوف هيك بالدول العربية ،  ضل يحاول يرجع الصندوق والفلوس وهي رافضة تماماً .

مش هون القصة ، كل الحجات الي بالشارع اجو اعطوه أكياس من شو ببيعو كل وحدة تعطيه شو بتبيع .

عبد الله الرويشد شاف المنظر رجع للحجة وحكالها يا حجة ما بدنا نعطيكي مصاري زي ما بدك ، بس احكيلنا ليش انت هون وين جوزك ووين أولادك ؟ وهون كانت الصدمة .

بلشت الحجة تقعد مكانها وحكتله جوزي اعطاك عمره استشهد ، ودخلت ايدها بعبها وطالت صورة شب وحكتله ما عندي الا هالشب محكوم ٣ مؤبدات وصارت تحكي قصة جوزها كيف استشهد وابنها كيف انحبس .

طبعاً كل الوفد كانت دموعهم عالأرض واترجوها بس يعملو معها مقابلة في البيت وراحو عملو معها مقابله وكتبت عنها كل جرايد الكويت .

ثاني يوم وانا داخل عالفندق  شفت عبد الله الرويشد حكالي انا ما نمت مبارح ، الحجة ما نيمتني وانا افكر فيها وحكى جملة ( إحنا كثيييير مقصرين في فلسطين ) .

سافرو وفي قلوبهم الكثير والكثير عن فلسطين التي لا يعرفونها وعن شعبها العظيم بسبب خنساوات ونساء فلسطين الي بالحسبة .

اسألي الرويشد عن فلسطين يا حياة الفهد عن الزيارة الي رفضوا الي بدك اطبعي معهم يعطوكي تصريح دخول وكنا نستناكي في فلسطين على أحر من الجمر انت وسعاد العبدالله عشان بنحبكم مش عشان تطعنينا هيك .

يا قصبي ويا شمراني اسألو المنتخب السعودي كيف استقبلناهم في فلسطين .

احنا بنحب كل شعوبنا العربية  ، عائلة القصيبي والشمراني عائلات عريقة نحترمها كما نحترم كل الشعوب العربية .

نحن في فلسطين لسنا شرذمة وبقايا حروب ، لا تساوي بين الجلاد والضحية يا شمراني ، انا من فلسطين وأصلي من مكة المكرمة يا قصيبي ، انا جدي علي بن ابي طالب رضي الله عنه وجدتي فاطمة بنت الرسول محمد صلى الله عليه وسلم .

جرت العادة في الفتوحات الاسلامية ان يبعثو أعرق العائلات العربية لأي منطقة حدودية لحمايتها ، كذلك فلسطين ، قام صلاح الدين الأيوبي بإرسال أعرق العائلات العربية لفلسطين لحمايتها .

وبتمنى ما حد يسب على الشعوب العربية بسبب موقف من شخص او أكثر ، شعوبنا العربية كلها مع فلسطين  بغض النظر عن موقف بلادهم الرسمي .

القدس عاصمة فلسطين الأبدية . الرحمة لشهدائنا والشفاء لجرحانا والفرج القريبء لأسرانا .